Tansah Setya Dumugi Wekasan

Bacaan: Yudas 1:17-25

Pepeling kanggo nyantosakake pracaya

1:17Nanging kowe iku, para kekasih, padha elinga marang pangandika kang dhek biyen wis kawedharake marang kowe kabeh dening para rasule Gusti Yesus Kristus. 1:18Jalaran kowe wis padha dipangandikani: “Besuk ngarepake jaman wekasan bakal ana juru pamoyok, kang lakune padha nguja hawa-nepsune kang mblasar.” 1:19Wong iku kang padha njalari cecongkrahan, kang mung dikuwasani dening pepenginan-pepenginan ing donya iki, lan uripe ora kadunungan Roh Suci. 1:20Nanging kowe para kekasih, padha mbanguna awakmu dhewe, kadhasarana pracayamu kang suci pinunjul, sarta ndedongaa ana ing patunggilane Sang Roh Suci. 1:21Padha rumeksaa marang awakmu dhewe mangkono, ana ing sajroning sihe Gusti Allah, kalawan nganti-anti marang sih-rahmate Gusti kita Yesus Kristus, tmuju ing urip langgeng. 1:22Welasana wong-wong kang isih mangu-mangu. 1:23Wong iku padha entasna srana karebut saka ing geni. Nanging ketokna welas-asihmu kakanthenan wedi, uga marang wong liya, sarta padha sengita marang sandhangane wong-wong kang kajemberake dening pepenginan-pepenginaning daging.

Panutup

1:24Panjenengane kang kuwasa ngreksa marang kowe kabeh, supaya padha ora kesandhung sarta mrenahake kowe kalawan tanpa cacad ana ing ngarsaning kamulyane kanthi sukarena. 1:25Gusti Allah kang sawiji, Pamarta kita, marga dening Gusti Yesus Kristus Gusti kita, iku kang sayogya kagungan kamulyan, kaluhuran, kasantosan sarta panguwaos, sadurunge dumadine jaman lan saiki sarta nganti salawase. Amin.

Dietrich Bonhoeffer salah satunggaling teolog misuwur saking Jerman, nalika gesang piyambakipun saestu nindakaken katresnan ingkang dipun wucalaken Gusti Yesus sanadyan kathah pambengan lan toh nyawa. Nalika wonten perang ing Jerman, piyambakipun saged nylametaken dhirinipun piyambak sarana nampi tawaran dados profesor ing salah satunggaling sekolah teologi ing Amerika. Ananging Bonhoeffer langkung milih wangsul dhateng Jerman lan berjuang kangge sederek-sederek ingkang ngalami Genosida karana Adolf Hitler. Bonheoffer aktif ngemutaken greja supados wantun nglawan tumindak ingkang mboten adil. Malahan piyambakipun nate nulungi tiyang Yahudi ingkang sami ngungsi dhateng Swiss, sanajan kathah pambengan lan ancaman, piyambakipun mboten ajrih. Tanggal 9 April 1945, Bonhoeffer dipun ukum pati kanthi cara dipun gantung wonten ing kamp konsentrasi Flossenburg. Piyambakipun sacara kamanungsan pejah, ananging punapa ingkang dipun perjuangaken punika langgeng lan saged maringi kaadilan tumrap tiyang sanes.

Wonten ing seratipun Yudas ngemutaken sadaya tiyang pitados bilih wonten ing pungkasan jaman badhe wonten Mesias palsu lan piwulang palsu. Matemah tiyang pitados kedah tansah mawas dhiri, setya nderek Gusti ngantos pungkasan gesangipun, mboten kagoda lan kebliyur piwulang palsu ingkang nengsemaken. Kados pundi caranipun: tansah emut dhawuh pangandikanipun Gusti lan nindakaken ing gesangipun. Pangandikanipun Gusti punika dados sarana kangge mbangun dhiri, ndadosaken manungsa punika eling lan waspada wonten ing satengahing gesang. Mekatena ugi sarana nindakaken pangandikanipun Gusti punika, gesang kita saged dados berkah kangge sesami. Kita ugi wantun ngemutaken sederek-sederek ingkang mblasar lan mburu pikajengipun piyambak, supados sederek kita punika sami mratobat sarta gesang enggal, setya tuhu nderek Gusti nganthi tumekaning pati.

Wonten ing masa adven punika kita dipun emutaken bilih rawuhipun Gusti sangsaya celak. Nalika mapag rawuhipun Gusti punika kita kedah setya tuhu miturut dhawuhipun sanadyan kathah pambengan lan panggodha ingkang kita alami. Mangga kita tansah mbangun dhiri, eling lan waspada, setya nderek Gusti lan leladi nganthi pungkasaning gesang kita.

 

(Pdt. Adhitya CN)