Nuwuhaken Pangajeng-ajeng Ing Gusti

Bacaan: Mazmur 20:1-10

 Pandonga nyuwun kaunggulan kagem Sang Prabu

1Kanggo lurah pasindhen. Masmur anggitane Prabu Dawud. (20-2) Sang Yehuwah mugi karsaa paring wangsulan dhumateng panjenengan dalem ing wekdal karibedan; asmaning Allahipun Rama Yakub mugi dadosa bebeteng dalem. 2(20-3) Sang Yehuwah mugi ngintunana pitulungan saking pasucen dhateng panjenengan dalem, sarta nyantosakaken panjenengan dalem saking Sion. 3(20-4) Gusti Allah mugi karsaa ngengeti sakathahing sesaosan dalem kurban, sarta karsaa nampeni kurban obaran dalem. (Selah) 4(20-5) Mugi panjenengan dalem pinaringan punapa ingkang kakarsakaken, sarta mugi sageda kalampahan punapa ingkang panjenengan dalem rancang. 5(20-6) Kawula sami badhe surak-surak margi saking kaunggulan dalem, sarta masang umbul-umbul margi saking asmanipun Gusti Allah kawula, Sang Yehuwah mugi njurungana ing sapanyuwun dalem. 6(20-7) Saiki aku sumurup yen Sang Yehuwah paring kaunggulan marang kang dijebadi, lan paring wangsulan saka ing swargane kang suci kalawan kamenangan kang gumilang dening astane tengen. 7(20-8) Wong iku padha nggunggung karetane lan wong kae nggunggung jarane, nanging aku padha nggunggung asmane Sang Yehuwah Allahku. 8(20-9) Wong iku padha ambruk, padha tiba, nanging aku padha ngadeg jejeg. 9(20-10) Dhuh Yehuwah, Paduka mugi paring kaunggulan dhateng Sang Prabu! Mugi karsaa paring wangsulan samangsa kawula munjuk!

Salah setunggaling kakiyatan manungsa kangge gesang inggih punika pangajeng-ajeng. Srana pangajeng-ajeng manungsa saged tahan ngadepi kasangsaran lan momotan gesang. Srana pangajeng-ajeng, kita boten badhe semplah anggenipun makarya lan nindakaken pandamelan kita. Srana pangajeng-ajeng, tiyang ingkang sakit saged saras, anak-anak ingkang rekaos anggenipun sinau saged lulus sekolahipun kanthi sae. Taun 2022 sekedap malih badhe kita tutup, kados pundi kaliyan gesang lan pakaryan kita ing taun punika? Punapa sampun kalaksanan kanthi sae miturut pangajeng-ajeng kita, punapa dereng?

Waosan kita ing dinten punika nyariosaken kesaksianipun Sang Juru Mazmur ingkang kagungan pangajeng-ajeng dhumateng Gusti Allah. Prabu Dawud ngajeng-ajeng supados Gusti Allah Sang Yehuwah kersa paring pitulungan ing wekdal karibedan (Ay. 2). Sang Yehuwah kersa nyantosaaken gesangipun (Ay. 3). Gusti Allah kersa ngengeti sakathahing sesaosan kurban lan nampeni kurban punika (Ay. 4). Boten namung ngaturaken pangajeng-ajengipun dhumateng Gusti Allah kemawon, Prabu Dawud ugi ngakeni bilih Gusti Allah Sang Yehuwah punika maha kuwaos. Panjenenganipun ingkang paring kamenangan bangsa Israel nalika perang nglawan bangsa sanes.

Mungkasi taun 2022 punika kita dipun ajak sami nliti priksa gesang kita piyambak-piyambak. Sepinten agenging pangajeng-ajeng kita dhumateng Gusti? Sepinten anggen kita netepi pangandika lan karsa-Nipun? Menawi ing taun punika, rancangan kita dereng saged kalaksanan, pakaryan kita dereng saged kasil sae, sampun ngantos kita semplah lan gresula. Mangga kita tetep mangun pangajeng-ajeng enggal bilih gesang kita ing taun ngajeng langkung sae lan endah ing rancanganipun Gusti. Kados Prabu Dawud ingkang gesang srana pangajeng-ajeng, sumangga kita pungkasi taun punika kanthi iman pitados bilih Gusti badhe mberkahi, nunggil lan ngayomi lampah gesang kita ing taun ngajeng. Pramila sampun ngantos kita kecalan pangajeng-ajeng dhumateng Gusti, nanging mangga sangsaya ngandelaken lan pitados dhumateng Gusti.

(Pdt. Adhitya CN)