Bonek

Bacaan: Ibrani 11:32-40 

11:32Sarta apa maneh sing kudu dakpratelakake? Jalaran aku bakal kakurangan wektu, manawa aku arep nyritakake bab Hakim Gidheon, Barak, Simson, Yefta, Sang Prabu Dawud lan Nabi Samuel sarta para nabi, 11:33kang marga saka pracaya wus nelukake nagara-nagara, nindakake pangadilan, nampani apa kang wis kaprasetyakake, mbungkem cangkeme singa-singa, 11:34nyirep geni kang mulad-mulad. Wong iku padha oncat saka landhepe pedhang, wus tampa kakuwatan sajrone nandhang apes, wus padha dadi santosa ing sajroning paprangan sarta wus ngundurake wadyabalaning mungsuh. 11:35Para ibu nampani maneh wong-wonge sing wis mati, jalaran padha ditangekake. Nanging wong-wong liyane padha milaur dipilara sarta ora gelem diluwari, supaya padha tampa patangen kang luwih becik. 11:36Ana maneh kang dipoyoki sarta disapu, malah ana kang dibanda sarta dikunjara. 11:37Padha dibenturi watu, digraji, dipateni kalawan pedhang; wong-wong iku padha nglembara kalawan manganggo lulang wedhus gembel lan lulang wedhus jawa, padha kacingkrangan, disangsara sarta dikaniaya. 11:38Donya iki ora pantes tumrap wong-wong iku. Padha nglambrang ana ing pasamunan sarta ing pagunungan, sajroning guwa-guwa sarta ing luweng-luwenging bumi. 11:39Sarta wong iku kabeh padha ora tampa apa kang kaprasetyakake iku, sanadyan pracayane wus aweh paseksen kang becik tumrap wong-wong iku. 11:40Jalaran Gusti Allah wus nyadhiyani kang luwih becik tumrap kita; tanpa kita wong-wong iku ora bisa tumeka ing kasampurnan.

Ing tlatah Jawi Wetan mliginipun ing kitha Surabaya wonten salah satunggaling tim panyengkuyung bal-balan ingkang dipun sebat BONEK, tegesipun bondo (modal) nekad. Kangge nyengkuyung timipun ingkang sanget dipun tresnani, para “bonek mania” punika namung modal “semangat” ingkang makantar-kantar lan nekad. Tanpa arta kangge sangu, ing kala mangsanipun wantun nyengkuyung timipun tandhing wonten sakjawinipun kitha Surabaya. Kadhang kala inggih ngantos toh nyawa kangge mujudaken prekawis punika.

Waosan punika mratelakaken para seksi iman ingkang mboten namung banda semangat lan nekad kemawon, inggih punika: Gideon, Barak, Simson, Yefta, Daud, Samuel sarta para nabi. Tiyang-tiyang punika dados seksining pracaya utawi iman. Punapa ingkang sampun katindhakaken dening tiyang-tiyang punika mboten krana namung nekad nanging saestu adhedasar pitados dhumateng panguwaosipun Gusti Allah (Ay. 6). Punika mawujud lantaran prastawa ingkang saestu ngedab-edabi ing salebeting gesangipun (Ay. 33-35). Kadhangkala ugi ngantos toh nyawa ngukuhi kapitadosanipun wonten ngarsanipun Gusti Allah. Kanthi iman, kapitadosan lan pengajeng-ajeng ingkang kekah, Gideon, Barak, Simson, Yefta, Daud, Samuel sarta para nabi saged ngadhepi maneka warni pacobaning gesang (Ay. 37).

Tiyang ingkang nggadahi iman utawi kapitadosan benten kaliyan tiyang ingkang namung banda nekad. Awit iman punika ugi mbetahaken nalar, petungan ingkang maton lan kadhasaraken saking paseksinipun kitab suci ingkang kita sanggemi minangka dhawuhipun Gusti Allah. Ewosemanten kita kedah tansah enget bilih iman punika nglangkungi sadaya nalar lan petunganipun manungsa. Bilih ing wekdal punika kita saweg ngadepi maneka warni pacobaning gesang ingkang ewed lan mokal kangge nalar pikiran kita, sumangga kita tansah mbudidaya ngadhepi kanthi iman ingkang kekah adhedasar kayekten sabdanipun Allah, mboten namung banda nekad.

(Pdt. Adhitya CN)