Konferensi Pers

Bacaan: Mazmur 17:1-9

1Pandongane Prabu Dawud. Dhuh Yehuwah, mugi karsaa miyarsakaken dhateng prakawis ingkang leres, mugi karsaa nggatosaken ing pasambat kawula; sarta mugi karsaa nilingaken dhateng ing pandonga kawula, saking ing lambe ingkang boten dora. 2Mugi kawula angsala kaadilan saking Paduka: paningal Paduka mugi nguningani punapa ingkang leres. 3Manawi Paduka nguji dhateng manah kawula, niti kawula ing wanci dalu, saha mriksa kawula Paduka boten badhe manggih punapa-punapa ingkang awon, ing cangkem kawula boten wonten panerak. 4Menggah pandamelanipun tiyang, manut sabda ingkang Paduka pangandikakaken, kawula boten tumut-tumut kaliyan tindakipun tiyang ingkang sami ambek roda-peksa; 5lampah kawula tetep ndherek ing tindak Paduka saha suku kawula boten sleyoran. 6Kawula nyebut dhumateng Paduka, amargi Paduka paring wangsulan dhumateng kawula, dhuh Allah; mugi Paduka karsaa nanggapaken talingan Paduka dhateng kawula mugi karsaa miyarsakaken atur kawula. 7Mugi Paduka karsaa ngatingalaken sih-rahmat Paduka ingkang elok, Paduka ingkang ngluwari tiyang ingkang sami ngungsi dhateng ing pangaubaning asta Paduka ingkang tengen margi saking wontenipun para ingkang sami mbalela. 8Mugi kawula Paduka reksa kados maniking mripat, sarta Paduka dhelikaken wonten ing ayoming swiwi Paduka: 9margi wonten tiyang duraka ingkang sami ngangkah dhateng karisakan kawula, inggih satru bebuyutan ingkang sami ngepang kawula.

Tembung konferensi pers punika tamtu mboten asing kangge kita, menawi kita nate mirsani ing tv lan YouTube. Asring para selebriti utawi pejabat ing negari punika ngawontenaken konferensi pers, saperlu nerangaken prekawis-prekawis ingkang dereng cetha kaleresanipun. Pengajeng-ajengipun, lumantar konferensi pers punika tiyang kathah saged nyumerepi punapa ingkang sae lan pundi ingkang leres.

Nalika kita ngadhepi rupi-rupi pacoben, padudon, utawi prekawis ingkang ewet asring kita nggadahi pepinginan kangge nerangaken punapa ingkang leres tumrap tiyang kathah. Nanging, benten kaliyan Prabu Dawud. Nalika ngadhepi regejegan lan padudon, piyambakipun mboten pados kabeneran ing ngajengipun manungsa. Miturut Prabu Dawud ingkang utami punika namung marek sowan ing ngarsanipun Gusti Allah. Namung Gusti Allah ingkang saged ningali kanthi adil lan sampurna. Prabu Dawuh tansah ngungsi ing ngarsanipun Gusti amargi piyambakipun yakin, tiyang ingkang tansah nglampahi gesangipun ing marginipun Gusti, Gusti tansah paring pitulungan. Sadaya punika wujuding kasetyan Prabu Dawud dhumateng Gusti.

Saking waosan punika kita sami nampi pepenget lumantar kasetyanipun Prabu Dawud. Sumangga kita tansah nglampahi pigesangan kanthi setya ndherek Gusti, sarta tansah mbidudaya nglampahi pigesangan ing margining Allah. Lajeng, nalika ngadhepi prastawa ingkang awrat kadosdene padudon, rubeda, utawi regejegan, sumangga kita nulad sikapipun Prabu Dawud. Mboten pados kabeneran ing ngajengipun manungsa, nanging tansah ngungsi ing ngarsanipun Gusti. Amargi namung Gusti Allah ingkang saged ningali isining manah kanthi jangkep, adil, lan sampurna. Namung Gusti Allah ingkang saged paring pangayoman sarta kakiyatan. Bilih kita saestu leres, Gusti sampun nyumerepi lan badhe paring berkah. Bilih kita lepat, Gusti badhe ngemutaken langkung-langkung nedahaken margi ingkang leres. Sumangga kita tansah nyelak ing ngrasanipun Gusti lan tansah nglampahi gesang padintenan miturut karsanipun Gusti.

(Pdt. Adhitya CN)